ياني ياني مش هصاحب بت تاني

الصحوبية على أد ما هي جميلة وجو لطيف وخروجات وتليفونات بالليل وبالنهار إلا أن الواحد بيوصل في وقت من الأوقات أنه عايز يضرب نفسه مليون "قلم" على سهوه.. مش قصدي أقول أنه غلطان لأنه بالفعل أذنب وارتكب أكبر خطيئة في حق نفسه.. بقي في عاقل يصاحب ومين بنت.

المقصود بالصحوبية الارتباط.. والعجيب في الارتباط أنه بقي طبيعي جدا جدا بين طلبة الابتدائي مش بتوع الجامعة بس عشان محدش يبقي أحسن من حد، وكل واحد بيغير على حبيبته بطريقة سواء بتاع ابتدائي او اعدادي أو ثانوي.. وبرضه سبحان الله الواحد منهم بيرجع يضرب نفسه بالجزمة القديمة أنه مشي ورا واحدة حتى ولو كانت ملكة جمال شرم الشيخ.. يعني القصير.. والكات.. والباديهات والحركات.

كل لما الواحد يفكر هو إيه اللى رماه على الحب والارتباط.. يكتشف انه مغفل كبير اتغلف قلبه بلبس البنت وطريقة كلامها ودلعها ونسي نكدها وخنقتها لما بتزعل، لانها بتتهمه في الاخر انه سبب زعلها حتى لو زعلانه من اهلها في البيت بتأنبه هو عشان مخدهاش في حضنه وطبطب عليها ونساها همها وحزنها.

وفعلا لازم كل شاب يقعد مع نفسه ويغني الاغنية الشعبية الشهيرة اللى بتقول "ياني ياني ياني مش هعمل كده تاني.. ياني ياني ياني م الحب الولاني"، وفي الاخر يستغفر ربه على الابتلاء ويقرر من جواه انه ميتجوزش إلا بشروط وضمانات وتعهدات واتفاقية دولية توقع عليها أمه وحماته ويكون الضامن احدي السيدات لأنهن فاهمات أنفسهن ولازم الواحد يحذر من مكرهن وعشان كده انسب حل "ميهرش الست إلا ست زيها" تبقي عارفه خباياها، ودماغها فيها ايه؟ وليه؟ وتتعدل إزاى؟

أنا من أشد المقتنعين أن أقوي سلاح قدام الست هو الكلام ثم الكلام ثم الكلام.. طز كتيييير في الأفعال.. لأن الست ديما تحب اللى يثبتها ويضحك عليها مش اللى يصارحها وميكدبش عليها.. اينعم الصراحة راحة لكن دي للي مبيعرفش.

والإنسان عرفوه بالعقل.. لو قعد الراجل الغلبان المنكسر المظلوم قدام جبروت المرأة مع نفسه شوية هيلاقي ان كلمات الأغنية الشعبية دي واقعية جدا جدا.


الكاتب مصطفي النجار
http://mostafaalnjjar.blogspot.com