لكل ست مليون خنزير

ديما بسأل نفسي ليه ربنا خلق الستات وايديهم بتاكلهم مش بيطيقوا يحطوا فيها فلوس لمدة طويلة أبدا، ديما تلاقي الواحدة منهن تجري تشتري أى حاجة وفي أي وقت ومع نفسها كده من غير لا تقول لا لجوزها ولا صاحبها ولا أبوها حتى.. بجد استوقفتني الملحوظة دي كتير وفي الأخر قلت ما اكبر دماغي واللى يعمل حاجة يعلمها.

وبعد ما قررت المرة دي أكبر دماغي بجد، لقيت ان الستات بيصرفوا في حاجات غريبة جدا.. يعني مثلا المغنية العالمية جنيفر لوبيز كان معاها قرشيم محيرنها فقامت أمنت على مؤخرتها، نعم مؤخرتها، بـ5 ملايين دولار، والله اللى بقوله معروف عند كتير لكن ده مثال فعلا على اسهال الصرف في أي حاجة. بعد ضغوط كتير ومعاناة للمرأة عشان تنزل سوق العمل وتزيد من زحمة المواصلات وخنقه المديرين والكبت الجسدي والنفسي عن الرجالة، نزلوا وبدل ما يساعدوا في البيوت خربوها وقعدوا على تلها.. كل واحدة توشوش صاحبتها ويخربوا بيوت بعض، ياريت كده وخلاص.. ميصحش طبعا.. دى الواحدة بعد ما تخرب بيت ولا اتنين تقول شوفوا الستات.. ما علينا ده مش موضوعنا، لكن الاخت بعد ما تخرب كام بيت وهى راجعة بيتها بقي تقوم داخلة اى سوبر ماركت أو تعدي على السوق وتضرب حاجات يجي بربع المرتب بتاعها لغاية ما تلاقي المرتب خلص قبل ما تقبضه أصلا.

في نهاية الحاجات الكتير اللى بتشتريها أى ست بيكون مصيرها صناديق الزبالة، مش كده وخلاص استنوا، بتفضل تزعق لعيالها وجوزها ليه ما أكلتوش وانا ارمي الاكل ده كله فين، وده طبعا بيتسبب في زيادة الوزن وتأخير عن مهام كتير أهم من الأكل، وبالتالي دخول الحمامات كتير لتصريف الاكل اللى ملوش لازمه وهو ده اللى بيسبب بوظان مستعجل وخراب لشبكات الصرف الصحي، وترجع الستات يشتكوا هى ليه شبكات الصرف بايه.. ما انتى عارفه يا فالحه منك ليها.

كمان نفسي اعرف غية الستات في شراء الجزم والشرابات وكمان الشنط، وياريت الحاجات دى كلها بتستخدم.. الواحدة تشتري مائة قطعة ومستخدمهومش غير مرتين تلاته.. طب ليه؟ ولا جوزك ده فلوسه حرام؟ فتقوم رده عليك فورا: دى فلوسي عرقي وشقايا؟

اذا كانت المصاريف سمة من سمات الجنس اللطيف طب ايه الهدف منها ولا هو مرض ولا غتاته حد يفهمني؟.. الباحثين الاقتصاديين غلبوا وعيطوا من ضعفهم وقلة حيلتهم لحسر ما تسببه السيدات من خسائر في الاحتياطي النقدي للاسر المصرية، محدث فاهم حاجة ولا الستات فاهمين انهم بيدموا اقتصاد مصر المحروسة بأفعالهم، وكمان بيكدسوا الزبالة في الطرقات وتلاقي كل ست وست ترمي مليون شنطة زبالة في عرض الشارع طبعا بعد ما الحكومة المحترمة بتاعت أخونا نظيف كنست الخنازير من مصر ونسفتهم بالجملة، واكتشفوا بعد النسف ده ان الستات بتعمل الزبالة ومحتاجين لكل ست مليون خنزير عشان ياكلوا بقايا الرجالة اللى بيروحوا ضحايا النساء كل يوم.

انا على اعتقاد وايمان شديد، أن ورا كل مشكلة توجد امراة أو عيل صغير، وزي ما المثل الشعبي بيقول "اللى يمشي ورا العيال ميخلاش من..........."، اللى عارف باقي المثل يقوله في سره بقي. لكن الستات في مشاكلهم أقل من العيال الصغيره لأن 99% منها تافهة لدرجة مستفزة ومملة في تفاصيلها زي الأفلام الأبيض وأسود اللى عقبال ما البطل يعرف أبوه الحقيقي يكون تتر النهاية طلع للمشاهدين.