غلطان اللى قال الستات نعمه.. اللهي يغورو.. أمييين

واحد صاحبي بعت لى حتت نكته بتقول "شارك معنا في دعم حملة تزويج البنات تحت شعار: لحد امتى هنضن المخدة"، ونكته تانيه بتقول "واحد وخطيبته قاعدين في كافتيريا ع الكورنيش فالنور قطع قالتله خد فرصتك بقي فخطب الشنطة وطلع يجري"، وطبعا الاخوة الخليجيين من ناحيتهم عايزين ينكتوا هما كمان فقالوا "ليلة عرسه مالقى موضوع يتكلم فيه قال لزوجته : اهلك يدرونك عندي"، كلام كتير بيتقال على البنات والولاد وللاسف الشديد البنات ديما ظالمين ونكديين ورخمين كمان وده مبرر لندالة الرجالة معاهم.

الناس البركة ديما بينصحوا الشباب "خلى بالك يا ابني من البنات ويقولوا لهم الندالة اتعملت عشانهم دول صنف ربنا ابتلانا بيه فربنا ياخدهم ويريحنا لكن كلنا عارفين ان ربنا بيختبرنا بقرفهم ونكدهم ورخامتهم ومكرهم كمان". نصايح كتيره ومحدش بيسمع "طب تستهلوا يا مصاحبين ويا مخطوبين ويا متجوزين"، كل شهر فوق الفواتير الكتير نكد وزهق وخنقه وكرشة نفس وامراض وقولون عصبي وسكر وارتفاع حاد في ضغط الدم، إلى جانب فشل كلوي في مرحلة عمرية معينة وفقع للمرارة، وبرود نفسي وجسدي وخمول في التعامل مع الأخرين ينتهي بالبلادة العقلية أو ربما عقد نفسية تنتهي بمستشفي العباسية بتاعت المجانين اللهم ما احفظنا.

كل لما الواحد يفكر يحسن الظن بالبنات أو الستات "ما انيل من سيدي إلا ستي" ، يلاقيهن متخلفات عقليا ويجيبوا شلل أطفال في طلباتهم ومصاريفهم، والواحده من دول بيحسسوا الراجل ولا الشاب انه مش مقصر معاه لا ده هو القصر نفسه، وكل واحدة تحب تحسس الراجل اللى معاها أنه أقل واحد في تدليعها والصرف عليها، بالمقارنة بكل صحابتها واقاربها وحتى كل الجنس اللطيف اللي ماشيين في الشارع حتى مرات البواب وازاى جوزها عم محمدين بيعاملها.

طبعا كلنا عارفين ان البنات مش ندالة بس لا دول كمان طماعين تلاقي الواحد مصاحبه واحد وعندها استبن اتنين وتلاته، فلو شاب الدنيا قصرت معاه وده طبيعي جدا في مصر، ليه تتعب نفسها وتجري وراه، غيره وارميه في الشارع وهات جوز غيره وكأنه جوز جزم ولا حد فاهم البنات دي طماعين ولا زي ما بيقولوا انهم منكسرين ولازم واحد يتستر عليها ويحميها.. وفي نفس الوقت تلاقي الشاب من دول مش مخلص يعني مصاحب كذا واحده وبيلاغي بنت الجيران ولا زميلته في الكلية ولا الشغل ولا في الدرس الخصوصي ولا في الكورس اللى بياخده.

محدش ينكر ان البنات كتير جدا بيقفوا جنب الراجل لكن كلهن استنهازيات يا رجالة، متلاقيش واحده واقفة جنبك إلا لو فيها "مصلحة"، والدليل شوفوا البنات بتعجب جدا بالشاب المكافح اللى بيذاكر وبيدح.. أه.. بتصاحب الواد الشيك الكاجول اللى مجنن البنات لكن تلف تلف وتروح ورا أخينا "الحريت" اللى بياكل الكتب أكل وبيحضر كل الحصص ولا المحاضرات ولا الدروس الخصوصية، أما في الشغل فتجري ورا اللى متفوق والرؤساء فرحانين منه أو اللى يجي منه عشان تضمن مستقبلها وتفضل تدي "هيلب في هيلب" عشان تلاقي لو السنارة غمزت يبقي مش مرتبط وتمام جدا هتدوس معاه ولو طلع مرتبط برضه هتدوس يمكن مش بيحب اللى معاه ولا ممكن يكون بيشتغلها وخلاص أو لو فقدت فيه الأمل تاخد منه مصلحة وخلاص خير ونعمه وفضل كمان من ربنا.