الوضوء الالكترونى

كل شوية الواحد يدخل يتوضا ويغرق أرض الحمام ويديها مسح بعد ما يخلص ، والحال دة خمس مرات كل يوم ، وياسلام بقى مع ايام البرد التلج أوى الواحد مبيبقاش قادر يحط المياه على جسمه.

عشان كده لازم نتوضا الكترونى ، منها توفير للمياه ومنها توفير لمسح الحمام ، وبدل ما نمسح الحمام 5 مرات فى اليوم نمسحه مرة ونخلى بقية المرات للشقة كلها.

وده على فكرة مش تخيل ولا مستحيل ، بعد ما دولة شقيقة كتر خيرها اخترعت لنا جهاز وضوء الكترونى ، واضح برضة ان عندهم ازمة فى مسح الحمامات بعد الوضوء.

وكمان بيوفر فى الوقت لانهم بيقولوا ان الوضوء بياخد دقيقة ونص بس.

وبيوزعوا مع كل جهاز كتالوج يعلم الناس ازاى تستخدمه ، وفين تحط ايديها ، وفين رجلها ، ووشها ، وبقها كمان ، بس مقالوش ازاى هيحطوا ودانهم عشان تتغسل ، هو مش غسيلها من ضمن الوضوء برضة.

انا قررت اجرب الجهاز دة منها توفير فى المياه والوقت ، والاهم توفير فى مرات مسح الحمام.

بس ياترى يطلع بكام جهاز زى دة .. طبعا السعر مهم جدا ، لانه لو كان غالى فليحيا مسح الحمام انشاالله عشر مرات فى اليوم ، او حتى نسيبه بميته مش لازم يتمسح ، حتى المياه تجيب طراوة فى الحر.

بس حاسس انه هيطلع غالى ، عارفين ليه ؟؟

لأنه صناعة عربية واللى دايما بتبقى غالية ، انما لو كان صينى كنت هجيبة وانا مغمض لأن دايما اسعارهم رخيصة.

برضة هسأل مش هخسر حاجة ، يمكن المعجزة تحصل ويكون سعره معقول والصناعة العربية تخيب ظنى المرة دى وتطلع رخيصة।

فكرة وكتابة

مصطفي النجار ونيفين أشرف