والنعمه انت بطل!!


استهل مقالي بالتأكيد أنني لست ضد اي ثورة ضد ظالم أو مجموعة من الظالمين.. ده حقك وحق أي حد تعمل مظاهرة تقلب نظام حكم.. تفكك حكومة.. تجيب أى حد يحكمك طالما انت راضي.. مش هقول عليك بتهدد الأمن القومي ولا الاقتصاد القومي ولا بتشرد عمال اليومية اللى بيعيشوا يوم بيوم هما واسرهم وهما كتير مش قليلين.. مش هقولك انت غلطان واللى فات كان طيب.. مش هقول اللى نعرفه احسن من اللى منعرفوش.. لكن وربك ما تخليني أكره الثورة وايامها ولياليها.. والنعمه انت بطل.

البطولة مش يعني انك تجري في مظاهرة أو تعمل إضراب.. البطولة إن تغامر بحياتك.. بدمك.. بفلوسك.. بعيالك.. بأسرتك.. بأعز ما تملك لتحقيق حلم أو هدف معين.. عمر ما كانت البطولة تقول لك كلمتين والسلام.. أو تهتف وتجعجع في السما.. او تنافق وتعيش انك مناضل.. أو فجأة تصحي فيك روح الوطنية وحب الوطن.. البطل بطل من يومه.. ومع ذلك هيرحك وأقول عليك بطل.

نجوم السيما والكورة وسياسيين.. وأصدمك وأقولك لو قلت لهم أبطال تبقي مش بطل.. مش معنىى انك اتفسحت في أرض الحرب تبقي بطل.. تعرف كام بطل ظهر للاعلام في الدنيا دي؟؟.. 1 -2-3-4-5.. كل دول من كتير البطل الحقيقي ديما خفي.. ميهموش يظهر ويعلن عن نفسه والناس تلتف حوليه ويصفقوا له لأنه مش بتاع مظاهر.. انت لو بطل والدنيا مفتحه لك هتعمل ايه؟؟

سؤال صعب جداً وإجابته أكيد هتفكر في نفسك أو في اهلك مش في وطنك.. الحياة صعبة وفيها شياطين من الانس والجن.. فيها مشاكل ومستحيلات.. فيها أنا وانت وفيها إنانية كمان.. مهما فكرت تبقي بطل متواضع مش هتعرف.. مهما فكرت تبقي بطل عادل مش هتعرف.. مهما حاولت تبقي كريم على غيرك هتبخل بكرمك.. مهما جربت تتواضع هتلاقي مولد حوليك يغريك.. لو كنت بطل حقيقي متبصش وراك متفكرش في اللى عملته.. قول كلمة حق واختفي.. متهربش اختفي عن العيون اللى عايزه تصنع منك بطل تشوفه الناس.. البطل الخفي هو البطل الحقيقي اللى كانوا بيسموه "الجندي المجهول" اللى حرر الأوطان ودافع عن الأبرياء ومات او استشهد_الله أعلم_ ومش كتير يعرفوا اسمه أو شكله.. عمر ما رئيس ولا وزير ولا أى مسئول حرر بلد بل أبناء الأوطان هم الأبطال حتي لو لم ينطقوا أو ينطق غيرها بهذا اللقب الغرور.

والنعمه انت بطل!! والنعمه انت بطل!! Reviewed by fun4liveever on February 27, 2011 Rating: 5

No comments:

Powered by Blogger.